Lajmet

Vazhdojnë punimet efikase në punëtorinë për hartimin e Udhëzimeve Administrative të Agjencionit Kadastral të Kosovës

Sot, në sesionin e punës për hartimin e Udhëzimeve Administrative për Ligjin e Kadastrës së Pronës së Paluajtshme, bashkë me drejtorin e AKK-së(Agjencia Kadastrale e Kosovës), Avni Ahmeti, dhe kolegë e bashkëpunëtorë të tjerë, zhvilluam një diskutim të hollësishëm mbi progresin e punës, duke përfshirë trajtimin e Udhëzimeve Administrative, me qëllim të finalizimit të tyre brenda një afati të shkurtër kohor.

Ritmi i punës dhe planet ambicioze të AKK-së, në kuadër të MMPHI-së, për përfundimin e 11 udhëzimeve deri në mars janë njëherit rezultat i një bashkëpunimi dhe pune të mirëfilltë. Këto udhëzime shërbejnë për një reformë rrënjësore në sektorin e kadastrës, dhe besojmë se përkushtimi jonë po krijon kushte të favorshme për themelimin e një sistemi kadastral të rregullt e të saktë, që do të kontribuojë në zhvillimin ekonomik të vendit tonë.

Në vijim të angazhimeve legjislative për vitin 2024, kemi parashikuar të ndërmarrim hapat e nevojshëm për hartimin dhe përgatitjen e gjashtëmbëdhjetë (16) projektligjeve kyçe, në kuadër të Ministrisë së Mjedisit, Planifikimit Hapësinor dhe Infrastrukturës.

Këto propozime ligjore, të cilat gëzojnë një rëndësi të veçantë për zhvillimin e vendit tonë, e për të mirën e përgjithshme të qytetarëve, do t'i nënshtrohen miratimit në Qeveri dhe më pas do të paraqiten për shqyrtim dhe aprovim në Kuvendin e Republikës së Kosovës.

Qëllimi ynë është që të gjitha këto projektligje të miratohen brenda afatit të përcaktuar, deri në përfundim të vitit 2024, për të siguruar zbatimin efektiv në përputhje me prioritetet dhe objektivat tona.