Lajmet

Sot, prita në takim Ambasadoren e Izraelit në Kosovë, znj. Tammy Ziv. Ambasadores i urova mirëseardhje në Prishtinë, njëherazi e urova për detyrën e re të saj, atë të ambasadores së parë të Izraelit në Kosovë. Në kuadër të këtij takimi e njoftova me punën dhe angazhimin tonë në Ministrinë e Mjedisit, Planifikimit Hapësinor dhe Infrastrukturës, dhe diskutuam në përgjithësi mbi marrëdhëniet dy-palëshe në mes dy vendeve tona, si në nivelin politik, ashtu edhe atë ekonomik. 

Në frymën e thellimit të bashkëpunimit tonë, potencuam vullnetin e të dyja vendeve për çështje me interes të përbashkët, veçanërisht në sektorin e ujërave, me ç’rast diskutuam për bashkëpunimin e ndërsjellë të mundshëm për projekte që do të ndikonin në përmirësimin e shërbimeve ndaj qytetarëve dhe ofrimin e shërbimeve më cilësore.

Diskutime për projektet tona me studiuesit e (MIT), njërit prej universiteteve më të mira në botë. 

Gjatë vizitës time në Massachusetts Institute of Technology (MIT), zhvillova takime të rëndësishme me hulumtues e studiues të mirënjohur të planifikimit hapësinor e arkitekturës, të cilët kanë shprehur interesimin e tyre që të jenë pjesë e transformimit në Kosovë. 

Për të mos i përsëritur gabimet e të kaluarës, dhe për t’i dhënë kahjen e duhur zhvillimit urban të Kosovës, na duhen këshillat dhe përvojat e studiuesve prej universiteteve më të mira në botë, siç është MIT.

Bashkëbiseduam për një gamë të gjerë temash të cilat aktualisht janë në tryezën e punës të Qeverisë së Kosovës: 

• Mundësitë për investime të reja në zonat urbane të Kosovës 
• Databazën e Sistemit Informatik Gjeografik (GIS), që do të mundësojë qasjen e secilit online në hartat pronësore dhe informacionet mbi secilën parcelë të tokës në Kosovë 
• Krijimin e databazës për energji solare 
• Procesin e legalizimit të ndërtimeve pa leje 
• Ndërtimin e databazës gjeohapësinore për energji të ripërtëritshme në Kosovë. 

Biseduam edhe me Dekanin e Shkollës së Arkitekturës dhe Planifikimit (MIT) z. Hashim Sarkis dhe shprehëm vullnetin që studentët tanë dhe profesionistët e Institutit të Planifikimit Hapësinor të Kosovës, ta kenë mundësinë t’u ekspozohen trajnimeve të ndryshme dhe teknikave më të fundit të planifikimit, në funksion të qëndrueshmërisë urbane dhe zhvillimit të qëndrueshëm, e njashtu edhe për nxitjen e zhvillimit të përgjithshëm ekonomik të vendit tonë.