Lajmet

Sot, në Ministrinë e Mjedisit, Planifikimit Hapësinor dhe Infrastrukturës, kemi nënshkruar Memorandumet e Mirëkuptimit për Projektin e Banimit Social Adekuat, një iniciativë me vlerë prej 37 milionë euro. Ky projekt ka si qëllim përmirësimin e kushteve të banimit për qytetarët me të ardhura të ulëta dhe të mesme, duke përfshirë edhe grupet më të cenueshme të shoqërisë.

Nën-projektet kryesore që do të realizohen brenda këtij projekti janë:

• Ndërtimin e projekteve të reja për banim social,

• Renovimin e njësive ekzistuese të banimit social dhe

• Rindërtimin apo renovimin e shtëpive private për familjet e cenueshme.

27 komuna kanë shprehur interes për t'u përfshirë në këtë projekt të rëndësishëm. Ky angazhim është një hap i madh përpara në krijimin e një të ardhmeje më të drejtë dhe më të qëndrueshme për qytetarët e Republikës së Kosovës.

Përkushtimi ynë për zhvillimin dhe përmirësimin e kushteve të jetesës vazhdon, dhe jam i bindur se ky projekt do të sjellë rezultate konkrete dhe të prekshme për ata që kanë më shumë nevojë.

Pas përurimit të rrugës Zhur-Brod vazhduam me përurimin e një projekti tjetër të rëndësishëm, atij Prevallë-Prizren.

Bashkë me kryeministrin Kurti, zv. ministrat Jeton Raka e Hysen Durmishi, shefin e kabinetit, Valon Hoti, deputetët dhe bashkëpunëtorët tanë nga Prizreni përuruam Rrugën Prizren – Prevallë.

Kjo rrugë, me një investim prej 15.7 milionë eurosh, është zgjeruar dhe modernizuar, duke e transformuar atë nga një sfidë për qytetarët në një rrugë më të qasshme, që njëkohësisht bën të mundur të shijohet pejsazhi pa shqetësime.

Rruga është zgjeruar nga 6 metra në 6.8 deri në 10 metra, ndërsa në pjesë të ndryshme është bërë me 3 korsi nga 2 sa ishin më herët. Ky investim jo vetëm që lehtëson jetën e përditshme të qytetarëve, por hap mundësi të reja për zhvillim ekonomik dhe turizëm në këtë zonë të mrekullueshme dhe me potencial të madh.