Lajmet

Në seancën e djeshme të Kuvendit, përveç Ligjit për Banim të Përballueshëm dhe Social, u miratuan edhe 3 ligje të tjera të rëndësishme nga MMPHI:

Ligji për Financimin e Menaxhimit të Resurseve Ujore:

Rregullon aspektin e menaxhimit financiar të resurseve ujore, përfshirë pagesat për shfrytëzimin e ujërave dhe shkarkimin e ujërave të ndotura, me qëllim të shfrytëzimit efikas të ujërave dhe mbrojtjen e ujërave nga veprimet e dëmshme.

Ligji për Ofruesin e Shërbimeve të Navigimit Ajror:

Rregullon statusin, mënyrën e organizimit dhe kompetencat e Ofruesit për Shërbimet e Navigimit Ajror, si subjekt i pavarur juridik në shërbim të interesit publik, për të siguruar infrastrukturën dhe shërbimet e navigacionit ajror në hapësirën ajrore të Republikës së Kosovës.

Ligji për Inspektoratin Qendror të Mjedisit, Ujërave, Natyrës, Ndërtimit, si dhe për Mbrojtjen nga Rrezatimi dhe Siguria Bërthamore:

Përcakton organizimin, të drejtat, detyrat, autorizimet, procedurat mbikëqyrëse e inspektuese.

Bashkë me Ministren Rizvanolli morëm pjesë në lansimin e raportit të Bankës Botërore për Klimën dhe Zhvillimin në Kosovë. Ky raport tregon një situatë shqetësuese, por gjithashtu konfirmon se jemi duke punuar në drejtimin e duhur për sigurinë e vendit dhe për të mbajtur Kosovën të jetueshme ndaj skenarëve klimatik të së ardhmes.

Studimi thotë se duhet të investojmë 2.8 miliardë euro për t’u mbrojtur nga ndikimet e ndryshimeve klimatike, kryesisht në projekte për ujë të pijshëm dhe ujitje. Kemi filluar tashmë me projekte për ndërtimin e rezervuarëve të rinj, si Firaja, Shtimja dhe Pollata, që do të ndihmojnë të përballojmë përmbytjet dhe thatësirat. Një pjesë e konsiderueshme e rekomandimeve të ekspertëve vetëm se janë në realizuar apo janë pjesë e strategjisë për përshtatje ndaj ndryshimit të klimës.

Po punohet me përkushtim për ta mbajt Kosovën të jetueshme edhe ndaj ndryshimeve të kushteve klimatike. Më shumë ujë, më shumë jetë.