Lajmet

Ministri Liburn Aliu se bashku me Kryeministrin e Republikës Albin Kurti, vizituam Agjencinë Kadastrale të Kosovës, me ç’rast bashkëbiseduam për projektet, punët, aktivitetet dhe planifikimet që kemi bërë për këtë vit dhe vitet në vijim.

Përgjatë Qeverisjes tonë, Agjencia Kadastrale e Kosovës ka bërë ndryshime rrënjësore, ku në kuadër të reformave drejt digjitalizimit për rritjen e cilësisë, efikasitetit dhe transparencës si dhe zhvillimeve të përgjithshme dhe avancimeve të reja, kemi ofruar shërbime cilësore për të gjithë qytetarët.

Në 20 vite para Qeverisjes Kurti, përafërsisht 20 milionë euro janë investuar në Agjencinë Kadastrale të Kosovës, e gjatë qeverisjes sonë tashmë 2 vjeçare, janë duke u investuar rreth 16 milionë euro. Pra, sa është investuar për 20 vite nga qeveritë e mëparshme, aq janë duke u investuar vetëm në 2 vite të qeverisjes sonë.

Përmes krijimit të një infrastrukture të duhur ligjore, me aprovim të Ligjit për Infrastrukturën Kombëtare të Informacionit Hapësinor dhe Ligjit për Kadastër që do të miratohet së shpejti, përkushtimi dhe investimi ynë në Agjencinë Kadastrale të Kosovës ka mundësuar që qytetarët të kenë shërbime të shpejta e cilësore.

Përveç realizimit të projekteve madhore, vlen të theksohet se gjatë këtij mandati qeverisës kemi arritur të digjitalizojmë listë e shërbimeve pronësore që tani mund të merren “online” përmes platformës eKosova, ku përpos Certifikatës mbi të drejtat pronësore në pronën e paluajtshme, tani i janë shtuar edhe nxjerrja e produkteve si në vijim:

certifikata mbi të drejtat në pronën e paluajtshme për anëtarë të familjes,

koordinatat e njësisë kadastrale,

koordinatat e njësisë kadastrale për anëtar të familjes,

kopja e planit dhe kopja e planit për anëtarë të familjes.

Gjurmimi i lëndës së dorëzuar në kadastër, nëpërmjet formës elektronike në web faqen e Agjencisë Kadastrale të Kosovës. Ky sistem është i qasshëm për të gjithë qytetarët e Kosovës me një klik nga shtëpitë e tyre. Para zhvillimit të kësaj mundësie, mënyra e vetme për informim për kërkesat e tyre, ishte nëpërmjet vizitës së drejtpërdrejtë në zyrën kadastrale komunale.

Agjencia Kadastrale e Kosovës, përbrenda Ministrisë së Mjedisit, Planifikimit Hapësinor dhe Infrastrukturës, është kyçe edhe në përfundimin me sukses të një procesi kritik për projekte infrastrukturore. Bëhet fjalë për shpronësime, për të cilat kur është marrë mandati i Qeverisë së re, borxhi shpronësimeve ka qenë në vlerë prej 183 milionë euro. Tani më, vetëm për dy vite, kemi arritur të përfundojmë pagesat për 75 milionë euro, dhe 25 milionë euro tjera janë buxhetuar për këtë vit, që i bie që për tre vite nga i gjithë borxhi i trashëguar prej 183 milionë euro, do ti shlyejmë rreth 55% të borxhit, për tre vite të qeverisjes sonë.

Në kuadër të Dialogut të Klimës, mora pjesë në punëtoritë e nivelit Ministror me temën: “Financimi për përshtatje ndaj ndryshimeve klimatike dhe dekarbonizimi ndër sektorial.”

Në intervenimin tim falënderova të dërguarin e posaçëm presidencial të Shteteve të Bashkuara për Klimën, Ish-Sekretarit të Shtetit Z. John Kerry dhe Sekretarin Parlamentar të Shtetit Gjerman në Ministrinë Federale për Çështjet Ekonomike dhe Mbrojtjen e Klimës, Z. Stefan Wenzel, për ndihmën bilaterale që ofrojnë SH.B.A-të dhe Gjermania në tranzicioni e drejtë të energjisë dhe përshtatjes ndaj ndryshimeve klimatike Kosovë.

Ky ishte intervenimi im gjatë seancës së sotshme:

Të nderuar Ministra dhe Udhëheqës të Shteteve,

Si Ministër i Mjedisit, Planifikimit Hapësinor dhe Infrastrukturës në Republikën e Kosovës, i bëj jehonë thirrjeve të kolegëve të nderuar që gjenden këtu, se inventarizimi global dhe COP28 duhet të kenë gjithnjë prioritet objektivat e dekarbonizimit sektorial. Megjithatë, ne duhet të sigurohemi, se përpjekjet tona drejtë përshtatjes klimatike të mos neglizhohen në mënyrë që edhe financimi të jetë sa më i arritshëm.

Republika e Kosovës mbështetet në lëndët djegëse fosile për përzierjen tonë energjetike dhe ne posedojmë një rezervë të madhe të linjitit, megjithatë ne kemi ndërmarrë veprime konkrete përmes projekteve që synojnë dekarbonizimin e sektorit tonë energjetik. Me mbështetjen e partnerëve tanë, si Shtetet e Bashkuara të Amerikës që përmes projektit të tyre të ruajtjes së baterive, do të lejojë integrimin e burimeve të rinovueshme, si dhe mbështetjen e Gjermanisë me projektin tjetër për energji të rinovueshme, na kanë mundësuar që sot të jemi pjesë e diskutimeve globale si ky i sotshmi, e që ne jemi duke avancuar me një ritëm të kënaqshëm.

Megjithatë, siç e keni përsëritur shumë prej jush, parimi "të mos lini askënd prapa", mbetet i paplotë përderisa vende si Kosova nuk janë të përfshira në proceset dhe mekanizmat e UNFCCC-së. Pavarësisht progresit tonë të dukshëm në rrugën drejtë zeros neto dhe angazhimit tonë indirekt ndaj Marrëveshjes së Parisit, Kosova mbetet i vetmi vend pa qasje në fondet shumëpalëshe për përshtatjen klimatike dhe negociatat e UNFCCC.

Vit pas viti, ne në Kosovë përballemi me pasojat shkatërruese të ndryshimeve klimatike, nga përmbytjet e mëdha deri te thatësirat ekstreme dhe zjarret e paprecedentë. Këto ngjarje vënë në provë përshtatshmërinë tonë ndaj klimës dhe ne vazhdojmë t'i bëjmë thirrje komunitetit global të mos na lërë pas. Ne meritojmë një shans të barabartë për t'u mbështetur në përgjigjen globale ndaj zbutjes dhe përshtatjes së ndryshimeve klimatike. Ndërsa ecim përpara, le të kujtojmë rëndësinë e përfshirjes së të gjitha kombeve në këto diskutime kritike, në mënyrë që së bashku të krijojmë një të ardhme të qëndrueshme për brezat që do të vijnë.