Lajmet

Nga Ceremonia e Nënshkrimit të Marrëveshjes me Fondin Saudit për Zhvillim, për Financimin e mëtutjeshëm të Rrugës Prishtinë - Mitrovicë.

Nëpërmjet nënshkrimit të marrëveshjes së sotme, Fondi Saudit për Zhvillim (Saudi Fund for Development-SFD), ka ofruar mbështetje për Projektin e Rrugës Nacionale N2 Prishtinë-Mitrovicë, duke akorduar një kredi shtesë prej 15 milionë euro, për segmentin që shtrihet nga Sremkovnica deri në Mitrovicë, me një gjatësi totale prej 5 km. Ky segment njëherit, është pjesë integrale e vazhdimit të këtij projekti që përfshin segmentin nga Lumi i Madh deri në Gojbulë, me një gjatësi totale prej 9.78 km.

Si një nga projektet më të rëndësishme infrastrukturore të vendit, ky projekt po realizohet sipas një plani dinamik dhe të detajuar, me mbikëqyrje të jashtme për të garantuar përmbushjen e standardeve më të larta gjatë ekzekutimit të punimeve. Rruga Prishtinë - Mitrovicë, po bëhet shumë shpejt një realitet i prekshëm dhe i rëndësishëm për zhvillimin ekonomik të vendit tonë.

Qeveria e Republikës së Kosovës dhe ajo e Mbretërisë së Arabisë Saudite harmonizuan tekstin e marrëveshjes për shërbime ajrore në mes të dy vendeve gjatë negociatave dy ditore, të udhëhequra nga delegacionet teknike ndërshtetëtore, të mbajtura më 29-30 korrik 2024 në Riad të Arabisë Saudite.

Harmonizimi i tekstit të marrëveshjes është fryt i komunikimeve të vazhdueshme të delegacioneve teknike të të dyja vendeve që nga fillimi i këtij viti, për të krijuar mundësinë për fillimin e linjave ajrore direkte në mes të dy vendeve duke lehtësuar udhëtimin e qytetarëve, qarkullimin e mallrave dhe shërbimeve si dhe të nxisë zhvillimin e biznesit në të dyja vendet në mënyrë sa më të efikase.

Poashtu, delegacionet ndërshtetërore u zotuan që në afat sa më të shkurtër të përfundojnë procedurat ligjore në fuqi në të dyja shtetet, të parapara për nënshkrimin, ratifikimin, dhe hyrjen në fuqi të kësaj marrëveshje.