Lajmet

Për herë të parë si Ministri kemi përgatitur doracakun zyrtar për dhënien e provimit të Patentës së Shoferit për të gjitha kategoritë.

Grupi Punues i zgjedhur nga Ministria e Mjedisit, Planifikimit Hapësinor dhe Infrastrukturës, tani ka përfunduar hartimin e Doracakut për Dhënien e Provimit për kategoritë A, B, C1, C dhe D dhe tani jemi në fazën e finalizimit ku ka mbetur të bëhet vetëm lektorimi.

Vlen të theksohet se deri më tani, Ministria nuk ka hartuar asnjëherë një "Doracak Zyrtar" për provimin e patentës së shoferit për çdo kategori, përveç pyetjeve me përgjigje të sakta për kategorinë "B", të cilat janë të publikuara në faqen zyrtare të Ministrisë.

Doracaku për të gjitha kategoritë e patentës së shoferit është hartuar duke marrë parasysh nevojën për përgatitje të duhur të kandidatëve për pajisje me patentë shoferë. Me anë të këtij doracaku, kandidatët mund të përgatiten më lehtë për provimin e patentës së shoferit për kategoritë për të cilat aplikojnë.

Takim i frytshëm e konstruktiv me ambasadorin e Suedisë në Kosovë, Jonas Westerlund, dhe përfaqësuesit e kompanisë prestigjioze ndërkombëtare Tetrapak.

Në këtë takim diskutuam për metodat dhe praktikat më të mira të mbrojtjes së mjedisit dhe riciklimit si dhe për mundësitë e mëtutjeshme të bashkëpunimit. Shprehëm gatishmërinë tonë që të bëjmë gjithçka që është e mundur për të përafruar praktikat më të mira globale dhe evropiane në sektorin mjedisor, ku tashmë veçse kemi filluar reformat e para dhe të rëndësishme, e të cilat padyshim do të rezultojnë që Kosova në të ardhmen afatmesme të jetë kryesuese në implementimin e obligimeve për ekonomi qarkore, në rajonin e Ballkanit Perëndimor.