Lajmet

Bashkë me Presidentën e Republikës së Kosovës znj. Vjosa Osmani dhe Ministrin e Bujqësisë, Pylltarisë dhe Zhvillimit Rural, z.Faton Peci, u zotuam se do ta bëjmë edhe më të bukur e më të pastër ambientin përreth nesh, duke bërë kështu mbjelljen e 1 milion drunjëve. 

Para një viti filluam mbjelljen nëpër komuna të ndryshme të Kosovës, për të vazhduar sot me mbjelljet e drunjëve në aksin rrugor që të shpie tek Aeroporti Ndërkombëtar i Prishtinës. Bashkëpunimi me qytetarë, biznese, komuna, e veçanërisht me mërgatën, për gjelbërim të mëtejshëm të vendit tonë, do të vazhdojë edhe më tej, sepse investimi më i mirë për vendin tonë është kujdesi që sot tregojmë ndaj mjedisit. Është obligim i gjithsecilit nga ne, që të angazhohemi për këtë detyrë të mirëfilltë patriotike.

Sot ishim në Hajvali dhe u takuam me shumë qytetarë që banojnë pranë magjistrales Prishtinë-Gjilan, apo më saktësisht aksit rrugor Hajvali-Graçanicë. Qytetarët kanë shprehur ankesat e tyre për rrezikshmërinë në atë pjesë të rrugës, ku ka pasur vazhdimisht aksidente e fatkeqësi, dhe sigurisht se kanë të drejtë në ngritjen e shqetësimit dhe evidentimin e problemit. Ne si Ministri morëm përsipër që të veprojmë në dy faza. 

Faza emergjente do të fillojë me vendosjen e sinjalistikës së domosdoshme, sinjalizimit vertikal e horizontal si dhe rregullimin e stacioneve të autobusëve, sepse sa më e mirë që të jetë sinjalistika, aq më të sigurta do të jenë rrugët për qytetarët. Faza e dytë ka të bëjë me zgjerimin dhe rregullimin e rrugës në segmentin Hajvali-Graçanicë, si dhe ndërtimin e Unazës, që do të bëhet me financim të BERZh-it, duke përmbushur kështu standardet e cilësisë dhe të sigurisë.

Edhe një herë apel për të gjithë vozitësit, që të respektoni rregullat e qarkullimit rrugor dhe të bëni kujdes të shtuar, sepse çdo nxitim e pakujdesi mund të dëmtojë rëndë jetën tuaj, apo të të tjerëve.