Lajmet

Miratohet në Kuvend Ligji për Banimin e Përballueshëm dhe Social

Sot, u votua edhe në lexim të dytë duke e miratuar përfundimisht ligjin për Banimin e Përballueshëm Social.

Ky projekt ka qenë njëri prej zotimeve e angazhimeve tona kyçe. Banimi i përballueshëm nuk ka ekzistuar as si ide e as si projekt më parë. Andaj, gjithçka kemi nisur nga zeroja që nga konceptimi fillestar, fizibiliteti për të kaluar tash së fundmi në aplikimin e komunave e deri te hapja e tenderit për ndërtimin e banimeve të para.

Po fillojmë shumë shpejtë me 4 komuna e 9 të tjera janë në radhë.

Na priftë e mbara!

Në seancën e djeshme të Kuvendit, përveç Ligjit për Banim të Përballueshëm dhe Social, u miratuan edhe 3 ligje të tjera të rëndësishme nga MMPHI:

Ligji për Financimin e Menaxhimit të Resurseve Ujore:

Rregullon aspektin e menaxhimit financiar të resurseve ujore, përfshirë pagesat për shfrytëzimin e ujërave dhe shkarkimin e ujërave të ndotura, me qëllim të shfrytëzimit efikas të ujërave dhe mbrojtjen e ujërave nga veprimet e dëmshme.

Ligji për Ofruesin e Shërbimeve të Navigimit Ajror:

Rregullon statusin, mënyrën e organizimit dhe kompetencat e Ofruesit për Shërbimet e Navigimit Ajror, si subjekt i pavarur juridik në shërbim të interesit publik, për të siguruar infrastrukturën dhe shërbimet e navigacionit ajror në hapësirën ajrore të Republikës së Kosovës.

Ligji për Inspektoratin Qendror të Mjedisit, Ujërave, Natyrës, Ndërtimit, si dhe për Mbrojtjen nga Rrezatimi dhe Siguria Bërthamore:

Përcakton organizimin, të drejtat, detyrat, autorizimet, procedurat mbikëqyrëse e inspektuese.