Lajmet

Në kuadër të pjesëmarrjes në Konferencën e Bankës Botërore për Tokën, në Washington, D.C., takova Drejtorin Ekzekutiv të Bankës Botërore z. Hayrettin Demircan dhe z. Hajdar Korbin, Këshilltarin e Drejtorit Ekzekutiv të Bankës Botërore.

Fillimisht, falënderova z. Demircan për përfaqësimin e Kosovës në Bordin e Bankës Botërore, me theks të veçantë për mbështetjen e finanacimit të projekteve të ndryshme nga ana e Bankës Botërore. Rrjedhimisht, i informova mbi ecuritë e projekteve ekzistuese të financuara nga Banka Botërore dhe shpalosa prioritetet kryesore të Ministrisë së Mjedisit, Planifikimit Hapësinor dhe Infrastrukturës.

Në këtë kontekst, theksova se një prej prioriteteve kryesore të MMPHI-së është rritja e kapaciteteve ujore të Kosovës, gjë që kërkon investime të konsiderueshme, si dhe rreth investimetr tjera që kanë ndikim në mjedis. Për më shumë, bashkëbiseduam për domosdoshmërinë e modernizimit të infrastrukturës për transport, duke përfshirë këtu edhe linjën hekurudhore Prishtinë-Durrës, që do të mundësonte qasje më të shpejtë e më të favorshme ekonomikisht në korridoret ndërkombëtare.

Njëherit, z. Demircan, i shpreha mirënjohjen time për kontributin e dhënë gjatë gjithë këtyre viteve nga Banka Botërore, dhe u dakorduam për të vijuar më tej me bashkëpunimin e ndërsjellë për projekte specifike, njëherit edhe për mundësitë e reja investuese të karakterit regjional.

Pata nderin e veçantë që bashkë me Ambasadorin e Republikës së Kosovës në ShBA, z. Ilir Dugolli, në Washington të takohemi me kongresistin Earl L. “Buddy” Carter , njëherazi Kryetarin e Nënkomisionit të Mjedisit, Prodhimit dhe Materialeve Kritike.

Kongresistin z. Carter e informova përgjithësisht për progresin nën drejtimin e Qeverisë sonë, ku në veçanti theksova transportin multi-modal, krijimin e lidhjeve më të mira rajonale me mobilitet të shtuar, favorizimin e automjeteve elektrike dhe hibride, si dhe bashkëbiseduam për mundësitë e investimeve të bizneseve amerikane në fushën e industrisë së gjelbër në Kosovë.

Për fund, kongresistin Carter e falënderova për mbështetjen që SHBA-të historikisht i kanë dhënë Kosovës, ku i shpreha mirënjohjen time për kontributin e pakursyer ndaj popullit dhe vendit tonë.