Lajmet

Për të katërtin vit radhazi, mora pjesë në Dialogun për Klimën në Petersberg të Gjermanisë, një nga forumet kryesore politike mbi agjendën klimatike në nivel global.

Këtë vit, ndryshe nga herët e kaluara, fola si përfaqësues i një vendi që sapo ka miratuar Kontributin e Parë të Përcaktuar (NDC)-në tonë vullnetare dhe të kushtëzuar. Ky dokument përmbyll katër vite të punës institucionale dhe diplomacisë klimatike. Kemi përcaktuar objektivin për uljen e emetimeve me 16.3% deri në vitin 2030 pa kushte, dhe potencialin për një ulje deri në 49% nëse sigurojmë qasje në financat ndërkombëtare për klimën. Një arritje kjo që dëshmon vullnetin tonë, pavarësisht sfidave politike.

Gjatë forumit pata mundësinë ta falënderoj Ministren Annalena Baerbock për udhëheqjen e saj të qartë dhe të qëndrueshme përgjatë këtyre katër viteve. Që nga takimi ynë i parë, kur ndamë realitetin e përjashtimit të Kosovës nga proceset formale ndërkombëtare për klimën, reagimi i saj ishte i menjëhershëm dhe i përgjegjshëm. Nga ai moment nisi pjesëmarrja jonë në COP dhe u themelua Partneriteti për Energji dhe Klimë ndërmjet Kosovës dhe Gjermanisë.

Ky forum mbetet thelbësor, jo vetëm për shkëmbimin e përvojave mes vendeve, por edhe për fuqizimin e politikave të ndershme dhe përfshirëse përballë një sfide që na prek të gjithëve. Dialogu për klimën duhet të vazhdojë, sepse vetëm përmes bashkëpunimit të sinqertë mund të ndërtojmë qëndrueshmëri të vërtetë.

Në kuadër të projektit FLOWS, arritëm që digën në Desivojcë të e zhvillojmë deri në dizajnin bazik. Një hap më tutje drejt maturimit të projektit, me qëllim që të fillojmë ndërtimin së shpejti. Qytetarët e rajonit të Kamenicës shpesh janë goditur nga thatësira të përsëritura dhe kanë më së paku disponueshmëri të ujit në krahasim me shifrat për rajonin. Aktualisht në këtë zonë, furnizimi me ujë për kokë banori është vetëm 1600 metra kub në vit, që është vetëm 16% e mesatares rajonale. Ndërsa uji i akumuluar për kokë banori është 290 metra kub, shumë më pak se mesatarja rajonale prej 696 metra kub.

Ndërtimi i kësaj dige përveç që adreson nevojën për ujë të pijshëm dhe ujitje, do jetë masë mbrotjeje kundrejt vërshimeve dhe do ketë edhe potencial të prodhimit të energjisë elektrike.